Sustainable Finance | Financial Literacy | Sustainable Future
हिन्दुकुश हिमालय जलवायु परिवर्तनको उच्च जोखिममा : राष्ट्र संघ
हिमनदी पतन र बाढी जलवायु जोखिमको गम्भीर संकेत
सोमबार, १५ भदौ २०८३, बेलुका ५:१०
संयुक्त राष्ट्रसंघीय जलवायु परिवर्तनसम्बन्धी महासन्धि (UNFCCC) का कार्यकारी सचिव साइमन स्टिलले नेपाल–चीन सीमाक्षेत्रमा भएको हिमनदी पतन र त्यसपछि आएको आकस्मिक बाढीले हिन्दूकुश हिमालय क्षेत्रको गम्भीर संवेदनशीलता उजागर गरेको बताएका छन्।
हिमनदी पतन र आकस्मिक बाढीका कारण ठूलो जनधनको क्षति भएको घटनाप्रति दुःख व्यक्त गर्दै स्टिलले यसबाट प्रभावित सबैप्रति समवेदना प्रकट गरेका छन्। उनले विशेषगरी आफन्त गुमाएका परिवारप्रति सहानुभूति व्यक्त गर्दै यस्तो विनाशकारी घटना अत्यन्त पीडादायी भएको बताएका हुन्।
स्टिलका अनुसार हिन्दूकुश हिमालय क्षेत्र जलवायु परिवर्तनका प्रभावप्रति अत्यन्त संवेदनशील छ। वैज्ञानिकहरू र स्थानीय समुदायले लामो समयदेखि यस क्षेत्रमा जलवायु परिवर्तनबाट उत्पन्न जोखिमबारे चेतावनी दिँदै आएको उल्लेख गर्दै उनले पछिल्लो घटनाले ती चेतावनीलाई थप गम्भीर रूपमा लिनुपर्ने देखाएको बताएका छन्।
उनले मानव गतिविधिबाट उत्सर्जित हरितगृह ग्यासका कारण पृथ्वी तात्दै जाँदा हिमाली क्षेत्रमा यस्ता जोखिम थप बढ्न सक्ने बताएका छन्। विशेषगरी कोइला, तेल र ग्यासजस्ता जीवाश्म इन्धनको निरन्तर प्रयोगले जलवायु संकटलाई थप गहिरो बनाइरहेको उनको भनाइ छ।
स्टिलले जलवायु परिवर्तनका कारण उत्पन्न जोखिमलाई कम गर्न विश्वले जीवाश्म इन्धनबाट नवीकरणीय ऊर्जातर्फको रूपान्तरणलाई तीव्र बनाउनुपर्नेमा जोड दिएका छन्। उनका अनुसार उत्सर्जन घटाउने प्रयाससँगै जलवायुजन्य विपद् सामना गर्न सक्ने क्षमता विकास गर्न पनि तत्काल लगानी आवश्यक छ।
उनले जलवायु परिवर्तनका प्रभावबाट सबैभन्दा बढी प्रभावित हुने समुदाय प्रायः सबैभन्दा कमजोर अवस्थामा रहेका उल्लेख गर्दै उनीहरूको सुरक्षा र उत्थानशीलता बढाउनु विश्वको प्राथमिकता हुनुपर्ने बताएका छन्।
स्टिलको वक्तव्यले नेपाल–चीन सीमाक्षेत्रको पछिल्लो विपद्लाई एउटा स्थानीय प्राकृतिक घटनाका रूपमा मात्र नभई जलवायु परिवर्तनसँग जोडिएको व्यापक हिमाली जोखिमको संकेतका रूपमा हेर्नुपर्ने सन्देश दिएको छ। हिन्दूकुश हिमालयमा बढ्दो जलवायु जोखिमबीच पूर्वतयारी, अनुकूलन र उत्थानशीलतामा लगानी बढाउनुपर्ने आवश्यकता उनको भनाइको मुख्य सन्देश हो।
प्रतिक्रिया 0