Sustainable Finance | Financial Literacy | Sustainable Future
डेभलपमेन्ट बैंकर्स एसोसिएसनको अध्यक्षमा दिनेश थकाली सर्बसम्मत
शुक्रबार, १३ कार्तिक २०८३, बेलुका ४:२९
काठमाडौं । डेभलपमेन्ट बैंकर्स एसोसिएसन नेपाल (डीबीएएन) को अध्यक्षमा कामना सेवा विकास बैंकका प्रमुख कार्यकारी अधिकृत (सीईओ) दिनेश थकाली सर्वसम्मत निर्वाचित भएका छन्।
एसोसिएसनको २१औँ वार्षिक साधारणसभाले थकालीको अध्यक्षतामा आगामी दुई वर्षका लागि नौ सदस्यीय नयाँ कार्यसमिति चयन गरेको हो। यसअघि कार्यवाहक अध्यक्षको जिम्मेवारी सम्हाल्दै आएका थकाली चार्टर्ड एकाउन्टेन्ट तथा अनुभवी बैंकर हुन्।
नयाँ कार्यसमितिको उपाध्यक्षमा गरिमा विकास बैंकका सीईओ माधवप्रसाद उपाध्याय, सचिवमा ज्योति विकास बैंकका सीईओ कपिल ढकाल र कोषाध्यक्षमा महालक्ष्मी विकास बैंकका सीईओ दीपेश लम्साल चयन भएका छन्।
त्यसैगरी, सदस्यहरूमा मुक्तिनाथ विकास बैंकका सीईओ तारा मानन्धर, लुम्बिनी विकास बैंकका सीईओ सुमन आचार्य, सांग्रिला डेभलपमेन्ट बैंकका सीईओ रविन सिजापति, ग्रीन डेभलपमेन्ट बैंकका सीईओ हरिबहादुर बुढाथोकी र मितेरी डेभलपमेन्ट बैंकका सीईओ अनन्तकुमार चापागाईं चयन भएका छन्।
कर्जा गुणस्तर र असुली सुधार प्राथमिकतामा
नवनिर्वाचित अध्यक्ष थकालीले विकास बैंकिङ क्षेत्रमा देखिएका समसामयिक चुनौती सम्बोधन गर्न संस्थागत सुशासन, जोखिम व्यवस्थापन, डिजिटल रूपान्तरण तथा मानव संसाधनको क्षमता अभिवृद्धिमा जोड दिने बताएका छन्।
त्यसैगरी, कर्जाको गुणस्तर सुधार, कर्जा असुलीलाई प्रभावकारी बनाउने तथा सदस्य बैंकहरूबीच ज्ञान, अनुभव र उत्कृष्ट अभ्यासको आदानप्रदानलाई प्राथमिकतामा राख्ने उनको प्रतिबद्धता छ।
वर्तमान बैंकिङ क्षेत्रमा खराब कर्जा व्यवस्थापन, कर्जा विस्तार, प्रविधिमा आधारित सेवा, साइबर सुरक्षा तथा सञ्चालन जोखिम व्यवस्थापनजस्ता विषय महत्त्वपूर्ण बन्दै गएका बेला विकास बैंकहरूबीच सामूहिक सहकार्य र समन्वयलाई थप प्रभावकारी बनाउने चुनौती नयाँ नेतृत्वसामु रहनेछ।
प्रतिक्रिया 0